आचारखण्ड — Adhyaya 70

इति श्रीगारुडे महापुराणे पूर्वखण्डे प्रथमांशाख्ये आचारकाण्डे मुक्ताफलप्रमाणादिवर्णनं नाम मुक्ताफलपरीक्षा नामैकोनसप्ततितमो ऽध्यायः श्रीगरुडमहापुराणम्- ७० सूत उवाच । दिवाकरस्तस्य महामहिम्नो महासुरस्योत्तमरत्नबीजम् । असृग्गृहीत्वा चरितुं प्रतस्थे निस्त्रिंशनीलेन नभः स्थलेन

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe muktāphalapramāṇādivarṇanaṃ nāma muktāphalaparīkṣā nāmaikonasaptatitamo 'dhyāyaḥ śrīgaruḍamahāpurāṇam- 70 sūta uvāca / divākarastasya mahāmahimno mahāsurasyottamaratnabījam / asṛggṛhītvā carituṃ pratasthe nistriṃśanīlena nabhaḥ sthalena

1.70.1

जेत्त्रा सुराणां समरेष्वजस्त्रं वीर्यावलेपोद्धतमानसेन । लङ्काधिपेनार्धपथे समेत्य स्वर्भानुनेव प्रसभं निरुद्धः

jettrā surāṇāṃ samareṣvajastraṃ vīryāvalepoddhatamānasena / laṅkādhipenārdhapathe sametya svarbhānuneva prasabhaṃ niruddhaḥ

1.70.2

तत्सिंहलीचारुनितम्बबिम्बविक्षो भितागाधमहाह्रदायाम् । पूगद्रुमाबद्धतटद्वयायां मुमोच सूर्यः सरिदुत्तमायाम्

tatsiṃhalīcārunitambabimbavikṣo bhitāgādhamahāhradāyām / pūgadrumābaddhataṭadvayāyāṃ mumoca sūryaḥ sariduttamāyām

1.70.3

ततः प्रभृति सा गङ्गा तुल्यपुण्यफलोदया । नाम्ना रावणगङ्गेति प्रथिमानमुपागता

tataḥ prabhṛti sā gaṅgā tulyapuṇyaphalodayā / nāmnā rāvaṇagaṅgeti prathimānamupāgatā

1.70.4

ततः प्रभृत्येव च शर्वरीषु कूलानि रत्नैर्निचितानि तस्याः । सुवर्णनाराचशतैरिवान्तर्बहिः प्रदीप्तैर्निशितानि भान्ति

tataḥ prabhṛtyeva ca śarvarīṣu kūlāni ratnairnicitāni tasyāḥ / suvarṇanārācaśatairivāntarbahiḥ pradīptairniśitāni bhānti

1.70.5

तस्यास्तटेपूज्ज्वचारुरागा भवन्ति तोयेषु च पद्मरागाः । सौगन्धिकोत्थाः कुरुविन्दजाश्च महागुणाः स्फाटिकसंप्रसूताः

tasyāstaṭepūjjvacārurāgā bhavanti toyeṣu ca padmarāgāḥ / saugandhikotthāḥ kuruvindajāśca mahāguṇāḥ sphāṭikasaṃprasūtāḥ

1.70.6

बन्धू कगुञ्जासकलेन्द्रगोपजवासमासृक्समवर्णशोभाः । भ्राजिष्णवो दाडिमबीजवर्णास्तथापरे किशुकपुष्पभासः

bandhū kaguñjāsakalendragopajavāsamāsṛksamavarṇaśobhāḥ / bhrājiṣṇavo dāḍimabījavarṇāstathāpare kiśukapuṣpabhāsaḥ

1.70.7

खिन्दुरपद्मोत्पलकुङ्कुमानां लाक्षारसस्यापि समानवर्णः । सांद्रे ऽपि रागे प्रभया स्वयैव भान्ति स्वलक्ष्याः स्फुटमध्यशोभाः

khindurapadmotpalakuṅkumānāṃ lākṣārasasyāpi samānavarṇaḥ / sāṃdre 'pi rāge prabhayā svayaiva bhānti svalakṣyāḥ sphuṭamadhyaśobhāḥ

1.70.8

भानोश्च भासामनुवेधयोगामासाद्य रशमि प्रकरेण दूरम् । पार्श्वानि सर्वाण्यनुरञ्जयन्ति गुणापपन्नाः स्फटिकप्रसूताः

bhānośca bhāsāmanuvedhayogāmāsādya raśami prakareṇa dūram / pārśvāni sarvāṇyanurañjayanti guṇāpapannāḥ sphaṭikaprasūtāḥ

1.70.9

कुसुंभनीलव्यतिमिश्ररागप्रत्युग्ररक्ताबुजतुल्यभासः । तथापरे ऽरुष्करकण्टकारिपुष्पत्विषो हिङ्गुलवत्त्विषो ऽन्ये

kusuṃbhanīlavyatimiśrarāgapratyugraraktābujatulyabhāsaḥ / tathāpare 'ruṣkarakaṇṭakāripuṣpatviṣo hiṅgulavattviṣo 'nye

1.70.10

चकोरपुंस्कोकिलसारसानां नेत्रावभासश्च भवन्ति केचित् । अन्ये पुनः सन्ति च पुष्पितानां तुल्यत्विषा कोकनदोत्तमानाम्

cakorapuṃskokilasārasānāṃ netrāvabhāsaśca bhavanti kecit / anye punaḥ santi ca puṣpitānāṃ tulyatviṣā kokanadottamānām

1.70.11

प्रभावकाठिन्यगुरुत्वयोगैः प्रायः समानाः स्फटिकोद्भवानाम् । आनीलरक्तोत्पलचारुभासः सौगन्धिकोत्था मणयो भवन्ति

prabhāvakāṭhinyagurutvayogaiḥ prāyaḥ samānāḥ sphaṭikodbhavānām / ānīlaraktotpalacārubhāsaḥ saugandhikotthā maṇayo bhavanti

1.70.12

कामं तु रागः कुरुविन्दजेषु स नैव यादृक् स्फटिकोद्भवेषु । निरर्चिषो ऽन्तर्बहुला भवन्ति प्रभाववन्तो ऽपि नतैः समस्तैः

kāmaṃ tu rāgaḥ kuruvindajeṣu sa naiva yādṛk sphaṭikodbhaveṣu / nirarciṣo 'ntarbahulā bhavanti prabhāvavanto 'pi nataiḥ samastaiḥ

1.70.13

ये तु रावणगङ्गायां जायन्ते कुरुविन्दकाः । पद्मरागघनं रागं बिभ्राणाः स्फटिकार्चिषः

ye tu rāvaṇagaṅgāyāṃ jāyante kuruvindakāḥ / padmarāgaghanaṃ rāgaṃ bibhrāṇāḥ sphaṭikārciṣaḥ

1.70.14

वर्णानुयायिनस्तेषा मान्ध्रदेशे तथा परे । न जायन्ते हि ये केचिन्मूल्यलेशमवाप्नुयुः

varṇānuyāyinasteṣā māndhradeśe tathā pare / na jāyante hi ye kecinmūlyaleśamavāpnuyuḥ

1.70.15

तथैव स्फाटिकोत्थानां देशे तुम्बुरुसंज्ञके । सधर्माणः प्रजायन्ते स्वल्पमूल्या हि ते स्मृताः

tathaiva sphāṭikotthānāṃ deśe tumburusaṃjñake / sadharmāṇaḥ prajāyante svalpamūlyā hi te smṛtāḥ

1.70.16

वर्णाधिक्यं गुरुत्वं च स्निग्धता समताच्छता । अर्चिष्मत्ता महत्ता च मणीनां गुणसंग्रहः

varṇādhikyaṃ gurutvaṃ ca snigdhatā samatācchatā / arciṣmattā mahattā ca maṇīnāṃ guṇasaṃgrahaḥ

1.70.17

ये कर्करच्छिद्रमलोपदिग्धाः प्रभाविमुक्ताः परुषा विवर्णाः । न ते प्रशस्ता मणयो भवन्ति समानतो जातिगुणैः समस्तैः

ye karkaracchidramalopadigdhāḥ prabhāvimuktāḥ paruṣā vivarṇāḥ / na te praśastā maṇayo bhavanti samānato jātiguṇaiḥ samastaiḥ

1.70.18

दोषोपसृष्टं मणिमप्रबोधाद्विभर्ति यः कश्चन कञ्चिदेव । तं शोकचिन्तामयमृत्युवित्तनाशादयो दोषगणा भजन्ते

doṣopasṛṣṭaṃ maṇimaprabodhādvibharti yaḥ kaścana kañcideva / taṃ śokacintāmayamṛtyuvittanāśādayo doṣagaṇā bhajante

1.70.19

कामं चारुतराः पञ्च जातीना प्रतिरूपकाः । विजा तयः प्रयत्नेन विद्वांस्तनुपलक्षयेत्

kāmaṃ cārutarāḥ pañca jātīnā pratirūpakāḥ / vijā tayaḥ prayatnena vidvāṃstanupalakṣayet

1.70.20

कलशपुरोद्भवसिंहलतुम्बुरुदेशोत्थमुक्तपाणीयाः । श्रीपूर्णकाश्च सदृशा विजातयः पद्मरागाणाम्

kalaśapurodbhavasiṃhalatumburudeśotthamuktapāṇīyāḥ / śrīpūrṇakāśca sadṛśā vijātayaḥ padmarāgāṇām

1.70.21

तुषोपसर्गात्कलशाभिधानमाताम्रभावादपि तुम्बुरूत्थम् । कार्ष्ण्यात्तथा सिंहलदेशजातं मुक्ताभिधानं नभसः स्वभावात्

tuṣopasargātkalaśābhidhānamātāmrabhāvādapi tumburūttham / kārṣṇyāttathā siṃhaladeśajātaṃ muktābhidhānaṃ nabhasaḥ svabhāvāt

1.70.22

श्रीपूर्णकं दीप्तिविनाकृतत्वाद्विजातिलिङ्गाश्रय एव भेदः । यस्ताम्रिकां पुष्यति पद्मरागो योगात्तुषाणामिव पूर्णमध्यः

śrīpūrṇakaṃ dīptivinākṛtatvādvijātiliṅgāśraya eva bhedaḥ / yastāmrikāṃ puṣyati padmarāgo yogāttuṣāṇāmiva pūrṇamadhyaḥ

1.70.23

स्त्रेहप्रदिग्धः प्रतिभाति यश्च यो वा प्रघृष्टः प्रजहाति दीप्तिम् । आक्रान्तमूर्धा च तथाङ्गुलिभ्यां यः कालिकां पार्श्वगतां बिभर्ति

strehapradigdhaḥ pratibhāti yaśca yo vā praghṛṣṭaḥ prajahāti dīptim / ākrāntamūrdhā ca tathāṅgulibhyāṃ yaḥ kālikāṃ pārśvagatāṃ bibharti

1.70.24

संप्राप्य चोत्क्षिप्य यथानुवृत्तिं विभर्तियः सर्वगुणानतीव । तुल्यप्रमाणस्य च तुल्यजातेर्यो वा गुरुत्वेन भवेत्तु तुल्यः । प्राप्यापि रत्नाकरजा स्वजातिं लक्षेद्गुरुत्वेन गुणेन विद्वान्

saṃprāpya cotkṣipya yathānuvṛttiṃ vibhartiyaḥ sarvaguṇānatīva / tulyapramāṇasya ca tulyajāteryo vā gurutvena bhavettu tulyaḥ / prāpyāpi ratnākarajā svajātiṃ lakṣedgurutvena guṇena vidvān

1.70.25

अप्रणश्यति सन्देहे शाणे तु परिलेखयेत् । सु(स्व) जातकसमुत्थेन लिखित्वापि परस्परम्

apraṇaśyati sandehe śāṇe tu parilekhayet / su(sva) jātakasamutthena likhitvāpi parasparam

1.70.26

वज्रं वा कुरुविन्दं वा विमुच्यानेन केनचित् । नाशक्यं लेखनं कर्तुं पद्मरागेन्द्रनीलयोः

vajraṃ vā kuruvindaṃ vā vimucyānena kenacit / nāśakyaṃ lekhanaṃ kartuṃ padmarāgendranīlayoḥ

1.70.27

जात्यस्य सर्वे ऽपि मणेर्न जातु विजातयः सन्ति समानवर्णाः । तथापि नानाकरणार्थमेव भेदप्रकारः परमः प्रदिष्टः

jātyasya sarve 'pi maṇerna jātu vijātayaḥ santi samānavarṇāḥ / tathāpi nānākaraṇārthameva bhedaprakāraḥ paramaḥ pradiṣṭaḥ

1.70.28

गुणोपपन्नेन सहावबद्धोमेणिर्न धार्यो विगुणो हि जात्या । न कौस्तुभेनापि सहावबद्धं विद्वान्विजातिं बिभृयात्कदाचित्

guṇopapannena sahāvabaddhomeṇirna dhāryo viguṇo hi jātyā / na kaustubhenāpi sahāvabaddhaṃ vidvānvijātiṃ bibhṛyātkadācit

1.70.29

चाण्डाल एको ऽपि यथा द्विजातीन्समेत्य भूरीनपि हन्त्ययत्नात् । अथो मणीन्भूरिगुणोपपन्नाञ्छक्रोति विप्लावयितुं विजात्यः

cāṇḍāla eko 'pi yathā dvijātīnsametya bhūrīnapi hantyayatnāt / atho maṇīnbhūriguṇopapannāñchakroti viplāvayituṃ vijātyaḥ

1.70.30

सपत्नमध्ये ऽपि कृताधिवासं प्रमादवृत्तावपि वर्तमानम् । न पद्मरागस्य महागुणस्य भर्तारमापत्स्पृशतीह काचित्

sapatnamadhye 'pi kṛtādhivāsaṃ pramādavṛttāvapi vartamānam / na padmarāgasya mahāguṇasya bhartāramāpatspṛśatīha kācit

1.70.31

दोषोपसर्गप्रभवाश्च ये ते नोपद्रवास्तं समभिद्रवन्ति । गुणैः समुत्तेजितचारुरागं यः पद्मरागं प्रयतो बिभर्ति

doṣopasargaprabhavāśca ye te nopadravāstaṃ samabhidravanti / guṇaiḥ samuttejitacārurāgaṃ yaḥ padmarāgaṃ prayato bibharti

1.70.32

वज्रस्य यत्तण्डुलसंख्ययोक्तं मूल्यं समुत्पादितगौरवस्य । तत्पद्मरागस्य महागुणस्य तन्माषकल्पाकलितस्य मूल्यम्

vajrasya yattaṇḍulasaṃkhyayoktaṃ mūlyaṃ samutpāditagauravasya / tatpadmarāgasya mahāguṇasya tanmāṣakalpākalitasya mūlyam

1.70.33

वर्णदाप्त्यपपन्नं हि मणिरत्नं प्रशस्यते । ताभ्यामीषदपि भ्रष्टं मणिमूल्यात्प्रहीयते

varṇadāptyapapannaṃ hi maṇiratnaṃ praśasyate / tābhyāmīṣadapi bhraṣṭaṃ maṇimūlyātprahīyate

1.70.34