← Vayaviya Samhita — Uttara Bhaga
वायवीयसंहिता उत्तरभाग — Adhyaya 38
उपमन्युरुवाच आलस्यं व्याधयस्तीव्राः प्रमादः स्थानसंशयः अनवस्थितचित्तत्वमश्रद्धा भ्रांतिदर्शनम्
upamanyuruvāca ālasyaṃ vyādhayastīvrāḥ pramādaḥ sthānasaṃśayaḥ anavasthitacittatvamaśraddhā bhrāṃtidarśanam
Vayaviya Samhita — Uttara Bhaga 38.1
दुःखानि दौर्मनस्यं च विषयेषु च लोलता दशैते युञ्जतां पुंसामन्तरायाः प्रकीर्तिताः
duḥkhāni daurmanasyaṃ ca viṣayeṣu ca lolatā daśaite yuñjatāṃ puṃsāmantarāyāḥ prakīrtitāḥ
Vayaviya Samhita — Uttara Bhaga 38.2
आलस्यमलसत्त्वं तु योगिनां देहचेतनोः धातुवैषम्यजा दोषा व्याधयः कर्मदोषजाः
ālasyamalasattvaṃ tu yogināṃ dehacetanoḥ dhātuvaiṣamyajā doṣā vyādhayaḥ karmadoṣajāḥ
Vayaviya Samhita — Uttara Bhaga 38.3
प्रमादो नाम योगस्य साधना नाम भावना इदं वेत्युभयाक्रान्तं विज्ञानं स्थानसंशयः
pramādo nāma yogasya sādhanā nāma bhāvanā idaṃ vetyubhayākrāntaṃ vijñānaṃ sthānasaṃśayaḥ
Vayaviya Samhita — Uttara Bhaga 38.4
अप्रतिष्ठा हि मनसस्त्वनवस्थितिरुच्यते अश्रद्धा भावरहिता वृत्तिर्वै योगवर्त्मनि
apratiṣṭhā hi manasastvanavasthitirucyate aśraddhā bhāvarahitā vṛttirvai yogavartmani
Vayaviya Samhita — Uttara Bhaga 38.5
विपर्यस्ता मतिर्या सा भ्रांतिरित्यभिधीयते दुःखमज्ञानजं पुंसां चित्तस्याध्यात्मिकं विदुः
viparyastā matiryā sā bhrāṃtirityabhidhīyate duḥkhamajñānajaṃ puṃsāṃ cittasyādhyātmikaṃ viduḥ
Vayaviya Samhita — Uttara Bhaga 38.6
आधिभौतिकमंगोत्थं यच्च दुःखं पुरा कृतैः आधिदैविकमाख्यातमशन्यस्त्रविषादिकम्
ādhibhautikamaṃgotthaṃ yacca duḥkhaṃ purā kṛtaiḥ ādhidaivikamākhyātamaśanyastraviṣādikam
Vayaviya Samhita — Uttara Bhaga 38.7
इच्छाविघातजं मोक्षं दौर्मनस्यं प्रचक्षते विषयेषु विचित्रेषु विभ्रमस्तत्र लोलता
icchāvighātajaṃ mokṣaṃ daurmanasyaṃ pracakṣate viṣayeṣu vicitreṣu vibhramastatra lolatā
Vayaviya Samhita — Uttara Bhaga 38.8
शान्तेष्वेतेषु विघ्नेषु योगासक्तस्य योगिनः उपसर्गाः प्रवर्तंते दिव्यास्ते सिद्धिसूचकाः
śānteṣveteṣu vighneṣu yogāsaktasya yoginaḥ upasargāḥ pravartaṃte divyāste siddhisūcakāḥ
Vayaviya Samhita — Uttara Bhaga 38.9
प्रतिभा श्रवणं वार्ता दर्शनास्वादवेदनाः उपसर्गाः षडित्येते व्यये योगस्य सिद्धयः
pratibhā śravaṇaṃ vārtā darśanāsvādavedanāḥ upasargāḥ ṣaḍityete vyaye yogasya siddhayaḥ
Vayaviya Samhita — Uttara Bhaga 38.10
सूक्ष्मे व्यवहिते ऽतीते विप्रकृष्टे त्वनागते प्रतिभा कथ्यते यो ऽर्थे प्रतिभासो यथातथम्
sūkṣme vyavahite 'tīte viprakṛṣṭe tvanāgate pratibhā kathyate yo 'rthe pratibhāso yathātatham
Vayaviya Samhita — Uttara Bhaga 38.11
श्रवणं सर्वशब्दानां श्रवणे चाप्रयत्नतः वार्त्ता वार्त्तासु विज्ञानं सर्वेषामेव देहिनाम्
śravaṇaṃ sarvaśabdānāṃ śravaṇe cāprayatnataḥ vārttā vārttāsu vijñānaṃ sarveṣāmeva dehinām
Vayaviya Samhita — Uttara Bhaga 38.12
दर्शनं नाम दिव्यानां दर्शनं चाप्रयत्नतः तथास्वादश्च दिव्येषु रसेष्वास्वाद उच्यते
darśanaṃ nāma divyānāṃ darśanaṃ cāprayatnataḥ tathāsvādaśca divyeṣu raseṣvāsvāda ucyate
Vayaviya Samhita — Uttara Bhaga 38.13
स्पर्शनाधिगमस्तद्वद्वेदना नाम विश्रुता गन्धादीनां च दिव्यानामाब्रह्मभुवनाधिपाः
sparśanādhigamastadvadvedanā nāma viśrutā gandhādīnāṃ ca divyānāmābrahmabhuvanādhipāḥ
Vayaviya Samhita — Uttara Bhaga 38.14
संतिष्ठन्ते च रत्नानि प्रयच्छंति बहूनि च स्वच्छन्दमधुरा वाणी विविधास्यात्प्रवर्तते
saṃtiṣṭhante ca ratnāni prayacchaṃti bahūni ca svacchandamadhurā vāṇī vividhāsyātpravartate
Vayaviya Samhita — Uttara Bhaga 38.15
रसायनानि सर्वाणि दिव्याश्चौषधयस्तथा सिध्यंति प्रणिपत्यैनं दिशंति सुरयोषितः
rasāyanāni sarvāṇi divyāścauṣadhayastathā sidhyaṃti praṇipatyainaṃ diśaṃti surayoṣitaḥ
Vayaviya Samhita — Uttara Bhaga 38.16
योगसिद्ध्यैकदेशे ऽपि दृष्टे मोक्षे भवेन्मतिः दृष्टमेतन्मया यद्वत्तद्वन्मोक्षो भवेदिति
yogasiddhyaikadeśe 'pi dṛṣṭe mokṣe bhavenmatiḥ dṛṣṭametanmayā yadvattadvanmokṣo bhavediti
Vayaviya Samhita — Uttara Bhaga 38.17
कृशता स्थूलता बाल्यं वार्धक्यं चैव यौवनम् नानाचातिस्वरूपं च चतुर्णां देहधारणम्
kṛśatā sthūlatā bālyaṃ vārdhakyaṃ caiva yauvanam nānācātisvarūpaṃ ca caturṇāṃ dehadhāraṇam
Vayaviya Samhita — Uttara Bhaga 38.18
पार्थिवांशं विना नित्यं सुरभिर्गन्धसंग्रहः एवमष्टगुणं प्राहुः पैशाचं पार्थिवं पदम्
pārthivāṃśaṃ vinā nityaṃ surabhirgandhasaṃgrahaḥ evamaṣṭaguṇaṃ prāhuḥ paiśācaṃ pārthivaṃ padam
Vayaviya Samhita — Uttara Bhaga 38.19
जले निवसनं चैव भूम्यामेवं विनिर्गमः इच्छेच्छक्तः स्वयं पातुं समुद्रमपि नातुरः
jale nivasanaṃ caiva bhūmyāmevaṃ vinirgamaḥ icchecchaktaḥ svayaṃ pātuṃ samudramapi nāturaḥ
Vayaviya Samhita — Uttara Bhaga 38.20
यत्रेच्छति जगत्यस्मिंस्तत्रैव जलदर्शनम् विना कुम्भादिकं पाणौ जलसञ्चयधारणम्
yatrecchati jagatyasmiṃstatraiva jaladarśanam vinā kumbhādikaṃ pāṇau jalasañcayadhāraṇam
Vayaviya Samhita — Uttara Bhaga 38.21
यद्वस्तु विरसञ्चापि भोक्तुमिच्छति तत्क्षणात् रसादिकं भवेच्चान्यत्त्रयाणां देहधारणम्
yadvastu virasañcāpi bhoktumicchati tatkṣaṇāt rasādikaṃ bhaveccānyattrayāṇāṃ dehadhāraṇam
Vayaviya Samhita — Uttara Bhaga 38.22
निर्व्रणत्वं शरीरस्य पार्थिवैश्च समन्वितम् तदिदं षोडशगुणमाप्यमैश्वर्यमद्भुतम्
nirvraṇatvaṃ śarīrasya pārthivaiśca samanvitam tadidaṃ ṣoḍaśaguṇamāpyamaiśvaryamadbhutam
Vayaviya Samhita — Uttara Bhaga 38.23
शरीरादग्निनिर्माणं तत्तापभयवर्जनम् शक्तिर्जगदिदं दग्धुं यदीच्छेदप्रयत्नतः
śarīrādagninirmāṇaṃ tattāpabhayavarjanam śaktirjagadidaṃ dagdhuṃ yadīcchedaprayatnataḥ
Vayaviya Samhita — Uttara Bhaga 38.24
स्थापनं वानलस्या ऽप्सु पाणौ पावकधारणम् दग्धे सर्गे यथापूर्वं मुखे चान्नादिपाचनम् द्वाभ्यां देहविनिर्माणमाप्यैश्वर्यसमन्वितम्
sthāpanaṃ vānalasyā 'psu pāṇau pāvakadhāraṇam dagdhe sarge yathāpūrvaṃ mukhe cānnādipācanam dvābhyāṃ dehavinirmāṇamāpyaiśvaryasamanvitam
Vayaviya Samhita — Uttara Bhaga 38.25
एतच्चतुर्विंशतिधा तैजसं परिचक्षते मनोजवत्वं भूतानां क्षणादन्तःप्रवेशनम्
etaccaturviṃśatidhā taijasaṃ paricakṣate manojavatvaṃ bhūtānāṃ kṣaṇādantaḥpraveśanam
Vayaviya Samhita — Uttara Bhaga 38.26
पर्वतादिमहाभारधारणञ्चाप्रयत्नतः गुरुत्वञ्च लघुत्वञ्च पाणावनिलधारणम्
parvatādimahābhāradhāraṇañcāprayatnataḥ gurutvañca laghutvañca pāṇāvaniladhāraṇam
Vayaviya Samhita — Uttara Bhaga 38.27
अंगुल्यग्रनिपाताद्यैर्भूमेरपि च कम्पनम् एकेन देहनिष्पत्तिर्युक्तं भोगैश्च तैजसैः
aṃgulyagranipātādyairbhūmerapi ca kampanam ekena dehaniṣpattiryuktaṃ bhogaiśca taijasaiḥ
Vayaviya Samhita — Uttara Bhaga 38.28
द्वात्रिंशद्गुणमैश्वर्यं मारुतं कवयो विदुः छायाहीनविनिष्पत्तिरिन्द्रियाणामदर्शनम्
dvātriṃśadguṇamaiśvaryaṃ mārutaṃ kavayo viduḥ chāyāhīnaviniṣpattirindriyāṇāmadarśanam
Vayaviya Samhita — Uttara Bhaga 38.29
खेचरत्वं यथाकाममिन्द्रियार्थसमन्वयः आकाशलंघनं चैव स्वदेहे तन्निवेशनम्
khecaratvaṃ yathākāmamindriyārthasamanvayaḥ ākāśalaṃghanaṃ caiva svadehe tanniveśanam
Vayaviya Samhita — Uttara Bhaga 38.30
आकाशपिण्डीकरणमशरीरत्वमेव च अनिलैश्वर्यसंयुक्तं चत्वारिंशद्गुणं महत्
ākāśapiṇḍīkaraṇamaśarīratvameva ca anilaiśvaryasaṃyuktaṃ catvāriṃśadguṇaṃ mahat
Vayaviya Samhita — Uttara Bhaga 38.31
ऐन्द्रमैश्वर्यमाख्यातमाम्बरं तत्प्रचक्षते यथाकामोपलब्धिश्च यथाकामविनिर्गमः
aindramaiśvaryamākhyātamāmbaraṃ tatpracakṣate yathākāmopalabdhiśca yathākāmavinirgamaḥ
Vayaviya Samhita — Uttara Bhaga 38.32
सर्वस्याभिभवश्चैव सर्वगुह्यार्थदर्शनम् कर्मानुरूपनिर्माणं वशित्वं प्रियदर्शनम्
sarvasyābhibhavaścaiva sarvaguhyārthadarśanam karmānurūpanirmāṇaṃ vaśitvaṃ priyadarśanam
Vayaviya Samhita — Uttara Bhaga 38.33
संसारदर्शनं चैव भोगैरैन्द्रैस्समन्वितम् एतच्चांद्रमसैश्वर्यं मानसं गुणतो ऽधिकम्
saṃsāradarśanaṃ caiva bhogairaindraissamanvitam etaccāṃdramasaiśvaryaṃ mānasaṃ guṇato 'dhikam
Vayaviya Samhita — Uttara Bhaga 38.34
छेदनं ताडनं चैव बंधनं मोचनं तथा ग्रहणं सर्वभूतानां संसारवशवर्तिनाम्
chedanaṃ tāḍanaṃ caiva baṃdhanaṃ mocanaṃ tathā grahaṇaṃ sarvabhūtānāṃ saṃsāravaśavartinām
Vayaviya Samhita — Uttara Bhaga 38.35
प्रसादश्चापि सर्वेषां मृत्युकालजयस्तथा आभिमानिकमैश्वर्यं प्राजापत्यं प्रचक्षते
prasādaścāpi sarveṣāṃ mṛtyukālajayastathā ābhimānikamaiśvaryaṃ prājāpatyaṃ pracakṣate
Vayaviya Samhita — Uttara Bhaga 38.36
एतच्चान्द्रमसैर्भोगैः षट्पञ्चाशद्गुणं महत् सर्गः संकल्पमात्रेण त्राणं संहरणं तथा
etaccāndramasairbhogaiḥ ṣaṭpañcāśadguṇaṃ mahat sargaḥ saṃkalpamātreṇa trāṇaṃ saṃharaṇaṃ tathā
Vayaviya Samhita — Uttara Bhaga 38.37
स्वाधिकारश्च सर्वेषां भूतचित्तप्रवर्तनम् असादृश्यं च सर्वस्य निर्माणं जगतः पृथक्
svādhikāraśca sarveṣāṃ bhūtacittapravartanam asādṛśyaṃ ca sarvasya nirmāṇaṃ jagataḥ pṛthak
Vayaviya Samhita — Uttara Bhaga 38.38
शुभाशुभस्य करणं प्राजापत्यैश्च संयुतम् चतुष्षष्ठिगुणं ब्राह्ममैश्वर्यं च प्रचक्षते
śubhāśubhasya karaṇaṃ prājāpatyaiśca saṃyutam catuṣṣaṣṭhiguṇaṃ brāhmamaiśvaryaṃ ca pracakṣate
Vayaviya Samhita — Uttara Bhaga 38.39
बौद्धादस्मात्परं गौणमैश्वर्यं प्राकृतं विदुः वैष्णवं तत्समाख्यातं तस्यैव भुवनस्थितिः ब्रह्मणा तत्पदं सर्वं वक्तुमन्यैर्न शक्यते
bauddhādasmātparaṃ gauṇamaiśvaryaṃ prākṛtaṃ viduḥ vaiṣṇavaṃ tatsamākhyātaṃ tasyaiva bhuvanasthitiḥ brahmaṇā tatpadaṃ sarvaṃ vaktumanyairna śakyate
Vayaviya Samhita — Uttara Bhaga 38.40
तत्पौरुषं च गौणं च गणेशं पदमैश्वरम् विष्णुना तत्पदं किंचिज्ज्ञातुमन्यैर्न शक्यते
tatpauruṣaṃ ca gauṇaṃ ca gaṇeśaṃ padamaiśvaram viṣṇunā tatpadaṃ kiṃcijjñātumanyairna śakyate
Vayaviya Samhita — Uttara Bhaga 38.41
विज्ञानसिद्धयश्चैव सर्वा एवौपसर्गिकाः निरोद्धव्या प्रयत्नेन वर्राग्येण परेण तु
vijñānasiddhayaścaiva sarvā evaupasargikāḥ niroddhavyā prayatnena varrāgyeṇa pareṇa tu
Vayaviya Samhita — Uttara Bhaga 38.42
प्रतिभासेष्वशुद्धेषु गुणेष्वासक्तचेतसः न सिध्येत्परमैश्वर्यमभयं सार्वकामिकम्
pratibhāseṣvaśuddheṣu guṇeṣvāsaktacetasaḥ na sidhyetparamaiśvaryamabhayaṃ sārvakāmikam
Vayaviya Samhita — Uttara Bhaga 38.43
तस्माद्गुणांश्च भोगांश्च देवासुरमहीभृताम् तृणवद्यस्त्यजेत्तस्य योगसिद्धिः परा भवेत्
tasmādguṇāṃśca bhogāṃśca devāsuramahībhṛtām tṛṇavadyastyajettasya yogasiddhiḥ parā bhavet
Vayaviya Samhita — Uttara Bhaga 38.44
अथवानुग्रहेच्छायां जगतो विचरेन्मुनिः यथाकामंगुणान्भोगान्भुक्त्वा मुक्तिं प्रयास्यति
athavānugrahecchāyāṃ jagato vicarenmuniḥ yathākāmaṃguṇānbhogānbhuktvā muktiṃ prayāsyati
Vayaviya Samhita — Uttara Bhaga 38.45
अथ प्रयोगं योगस्य वक्ष्ये शृणु समाहितः शुभे काले शुभे देशे शिवक्षेत्रादिके पुनः विजने जंतुरहिते निःशब्दे बाधवर्जिते
atha prayogaṃ yogasya vakṣye śṛṇu samāhitaḥ śubhe kāle śubhe deśe śivakṣetrādike punaḥ vijane jaṃturahite niḥśabde bādhavarjite
Vayaviya Samhita — Uttara Bhaga 38.46
सुप्रलिप्ते स्थले सौम्ये गन्धधूपादिवासिते मुक्तपुष्पसमाकीर्णे वितानादि विचित्रिते
supralipte sthale saumye gandhadhūpādivāsite muktapuṣpasamākīrṇe vitānādi vicitrite
Vayaviya Samhita — Uttara Bhaga 38.47
कुशपुष्पसमित्तोयफलमूलसमन्विते नाग्न्यभ्याशे जलाभ्याशे शुष्कपर्णचये ऽपि वा
kuśapuṣpasamittoyaphalamūlasamanvite nāgnyabhyāśe jalābhyāśe śuṣkaparṇacaye 'pi vā
Vayaviya Samhita — Uttara Bhaga 38.48
न दंशमशकाकीर्णे सर्पश्वापदसंकुले न च दुष्टमृगाकीर्णे न भये दुर्जनावृते
na daṃśamaśakākīrṇe sarpaśvāpadasaṃkule na ca duṣṭamṛgākīrṇe na bhaye durjanāvṛte
Vayaviya Samhita — Uttara Bhaga 38.49
श्मशाने चैत्यवल्मीके जीर्णागारे चतुष्पथे नदीनदसमुद्राणां तीरे रथ्यांतरे ऽपि वा
śmaśāne caityavalmīke jīrṇāgāre catuṣpathe nadīnadasamudrāṇāṃ tīre rathyāṃtare 'pi vā
Vayaviya Samhita — Uttara Bhaga 38.50
न जीर्णोद्यानगोष्ठादौ नानिष्टे न च निंदिते नाजीर्णाम्लरसोद्गारे न च विण्मूत्रदूषिते
na jīrṇodyānagoṣṭhādau nāniṣṭe na ca niṃdite nājīrṇāmlarasodgāre na ca viṇmūtradūṣite
Vayaviya Samhita — Uttara Bhaga 38.51
नच्छर्द्यामातिसारे वा नातिभुक्तौ श्रमान्विते न चातिचिंताकुलितो न चातिक्षुत्पिपासितः
nacchardyāmātisāre vā nātibhuktau śramānvite na cāticiṃtākulito na cātikṣutpipāsitaḥ
Vayaviya Samhita — Uttara Bhaga 38.52
नापि स्वगुरुकर्मादौ प्रसक्तो योगमाचरेत् युक्ताहारविहारश्च युक्तचेष्टश्च कर्मसु
nāpi svagurukarmādau prasakto yogamācaret yuktāhāravihāraśca yuktaceṣṭaśca karmasu
Vayaviya Samhita — Uttara Bhaga 38.53
युक्तनिद्राप्रबोधश्च सर्वायासविवर्जितः आसनं मृदुलं रम्यं विपुलं सुसमं शुचि
yuktanidrāprabodhaśca sarvāyāsavivarjitaḥ āsanaṃ mṛdulaṃ ramyaṃ vipulaṃ susamaṃ śuci
Vayaviya Samhita — Uttara Bhaga 38.54
पद्मकस्वस्तिकादीनामभ्यसेदासनेषु च अभिवंद्य स्वगुर्वंतानभिवाद्याननुक्रमात्
padmakasvastikādīnāmabhyasedāsaneṣu ca abhivaṃdya svagurvaṃtānabhivādyānanukramāt
Vayaviya Samhita — Uttara Bhaga 38.55
ऋजुग्रीवशिरोवक्षा नातिष्ठेच्छिष्टलोचनः किंचिदुन्नामितशिरा दंतैर्दंतान्न संस्पृशेत्
ṛjugrīvaśirovakṣā nātiṣṭhecchiṣṭalocanaḥ kiṃcidunnāmitaśirā daṃtairdaṃtānna saṃspṛśet
Vayaviya Samhita — Uttara Bhaga 38.56
दंताग्रसंस्थिता जिह्वामचलां सन्निवेश्य च पार्ष्णिभ्यां वृषणौ रक्षंस्तथा प्रजननं पुनः
daṃtāgrasaṃsthitā jihvāmacalāṃ sanniveśya ca pārṣṇibhyāṃ vṛṣaṇau rakṣaṃstathā prajananaṃ punaḥ
Vayaviya Samhita — Uttara Bhaga 38.57
ऊर्वोरुपरि संस्थाप्य बाहू तिर्यगयत्नतः दक्षिणं करपृष्ठं तु न्यस्य वामतलोपरि
ūrvorupari saṃsthāpya bāhū tiryagayatnataḥ dakṣiṇaṃ karapṛṣṭhaṃ tu nyasya vāmatalopari
Vayaviya Samhita — Uttara Bhaga 38.58
उन्नाम्य शनकैः पृष्ठमुरो विष्टभ्य चाग्रतः संप्रेक्ष्य नासिकाग्रं स्वं दिशश्चानवलोकयन्
unnāmya śanakaiḥ pṛṣṭhamuro viṣṭabhya cāgrataḥ saṃprekṣya nāsikāgraṃ svaṃ diśaścānavalokayan
Vayaviya Samhita — Uttara Bhaga 38.59
संभृतप्राणसंचारः पाषाण इव निश्चलः स्वदेहायतनस्यांतर्विचिंत्य शिवमंबया
saṃbhṛtaprāṇasaṃcāraḥ pāṣāṇa iva niścalaḥ svadehāyatanasyāṃtarviciṃtya śivamaṃbayā
Vayaviya Samhita — Uttara Bhaga 38.60
हृत्पद्मपीठिकामध्ये ध्यानयज्ञेन पूजयेत् मूले नासाग्रतो नाभौ कंठे वा तालुरंध्रयोः
hṛtpadmapīṭhikāmadhye dhyānayajñena pūjayet mūle nāsāgrato nābhau kaṃṭhe vā tāluraṃdhrayoḥ
Vayaviya Samhita — Uttara Bhaga 38.61
भ्रूमध्ये द्वारदेशे वा ललाटे मूर्ध्नि वा स्मरेत् परिकल्प्य यथान्यायं शिवयोः परमासनम्
bhrūmadhye dvāradeśe vā lalāṭe mūrdhni vā smaret parikalpya yathānyāyaṃ śivayoḥ paramāsanam
Vayaviya Samhita — Uttara Bhaga 38.62
तत्र सावरणं वापि निरावरणमेव वा द्विदलेषोडशारे वा द्वादशारे यथाविधि
tatra sāvaraṇaṃ vāpi nirāvaraṇameva vā dvidaleṣoḍaśāre vā dvādaśāre yathāvidhi
Vayaviya Samhita — Uttara Bhaga 38.63
दशारे वा षडस्रे वा चतुरस्रे शिवं स्मरेत् भ्रुवोरंतरतः पद्मं द्विदलं तडिदुज्ज्वलम्
daśāre vā ṣaḍasre vā caturasre śivaṃ smaret bhruvoraṃtarataḥ padmaṃ dvidalaṃ taḍidujjvalam
Vayaviya Samhita — Uttara Bhaga 38.64
भ्रूमध्यस्थारविन्दस्य क्रमाद्वै दक्षिणोत्तरे विद्युत्समानवर्णे च पर्णे वर्णावसानके
bhrūmadhyasthāravindasya kramādvai dakṣiṇottare vidyutsamānavarṇe ca parṇe varṇāvasānake
Vayaviya Samhita — Uttara Bhaga 38.65
षोडशारस्य पत्राणि स्वराः षोडश तानि वै पूर्वादीनि क्रमादेतत्पद्मं कन्दस्य मूलतः
ṣoḍaśārasya patrāṇi svarāḥ ṣoḍaśa tāni vai pūrvādīni kramādetatpadmaṃ kandasya mūlataḥ
Vayaviya Samhita — Uttara Bhaga 38.66
ककारादिटकारांता वर्णाः पर्णान्यनुक्रमात् भानुवर्णस्य पद्मस्य ध्येयं तद् १धृदयान्तरे
kakārādiṭakārāṃtā varṇāḥ parṇānyanukramāt bhānuvarṇasya padmasya dhyeyaṃ tad 1dhṛdayāntare
Vayaviya Samhita — Uttara Bhaga 38.67
गोक्षीरधवलस्योक्ता डादिफान्ता यथाक्रमम् अधो दलस्याम्बुजस्य एतस्य २ च दलानि षट्
gokṣīradhavalasyoktā ḍādiphāntā yathākramam adho dalasyāmbujasya etasya 2 ca dalāni ṣaṭ
Vayaviya Samhita — Uttara Bhaga 38.68
विधूमांगारवर्णस्य वर्णा वाद्याश्च लान्तिमाः मूलाधारारविंदस्य हेमाभस्य यथाक्रमम् वकारादिसकारान्ता वर्णाः पर्णमयाः स्थिताः
vidhūmāṃgāravarṇasya varṇā vādyāśca lāntimāḥ mūlādhārāraviṃdasya hemābhasya yathākramam vakārādisakārāntā varṇāḥ parṇamayāḥ sthitāḥ
Vayaviya Samhita — Uttara Bhaga 38.69
एतेष्वथारविंदेषु यत्रैवाभिरतं मनः तत्रैव देवं देवीं च चिंतयेद्धीरया धिया
eteṣvathāraviṃdeṣu yatraivābhirataṃ manaḥ tatraiva devaṃ devīṃ ca ciṃtayeddhīrayā dhiyā
Vayaviya Samhita — Uttara Bhaga 38.70
अंगुष्ठमात्रममलं दीप्यमानं समंततः शुद्धदीपशिखाकारं स्वशक्त्या पूर्णमण्डितम्
aṃguṣṭhamātramamalaṃ dīpyamānaṃ samaṃtataḥ śuddhadīpaśikhākāraṃ svaśaktyā pūrṇamaṇḍitam
Vayaviya Samhita — Uttara Bhaga 38.71
इन्दुरेखासमाकारं तारारूपमथापि वा नीवारशूकस्सदृशं बिससुत्राभमेव वा
indurekhāsamākāraṃ tārārūpamathāpi vā nīvāraśūkassadṛśaṃ bisasutrābhameva vā
Vayaviya Samhita — Uttara Bhaga 38.72
कदम्बगोलकाकारं तुषारकणिकोपमम् क्षित्यादितत्त्वविजयं ध्याता यद्यपि वाञ्छति
kadambagolakākāraṃ tuṣārakaṇikopamam kṣityāditattvavijayaṃ dhyātā yadyapi vāñchati
Vayaviya Samhita — Uttara Bhaga 38.73
तत्तत्तत्त्वाधिपामेव मूर्तिं स्थूलां विचिंतयेत् सदाशिवांता ब्रह्माद्यभवाद्याश्चाष्टमूर्तयः
tattattattvādhipāmeva mūrtiṃ sthūlāṃ viciṃtayet sadāśivāṃtā brahmādyabhavādyāścāṣṭamūrtayaḥ
Vayaviya Samhita — Uttara Bhaga 38.74
शिवस्य मूर्तयः स्थूलाः शिवशास्त्रे विनिश्चिताः घोरा मिश्रा प्रशान्ताश्च मूर्तयस्ता मुनीश्वरैः
śivasya mūrtayaḥ sthūlāḥ śivaśāstre viniścitāḥ ghorā miśrā praśāntāśca mūrtayastā munīśvaraiḥ
Vayaviya Samhita — Uttara Bhaga 38.75
फलाभिलाषरहितैश्चिन्त्याश्चिन्ताविशारदैः घोराश्चेच्चिंतिताः कुर्युः पापरोगपरिक्षयम्
phalābhilāṣarahitaiścintyāścintāviśāradaiḥ ghorāścecciṃtitāḥ kuryuḥ pāparogaparikṣayam
Vayaviya Samhita — Uttara Bhaga 38.76
चिरेण मिश्रे सौम्ये तु न सद्यो न चिरादपि सौम्ये मुक्तिर्विशेषेण शांतिः प्रज्ञा प्रसिध्यति
cireṇa miśre saumye tu na sadyo na cirādapi saumye muktirviśeṣeṇa śāṃtiḥ prajñā prasidhyati
Vayaviya Samhita — Uttara Bhaga 38.77
सिध्यंति सिद्धयश्चात्र क्रमशो नात्र संशयः
sidhyaṃti siddhayaścātra kramaśo nātra saṃśayaḥ
Vayaviya Samhita — Uttara Bhaga 38.78