आचारखण्ड — Adhyaya 90

इति श्रीगारुडे महापुराणे पूर्वखण्डे प्रथमांशाख्ये आचारकाण्डे रुचिकृतपितृस्तोत्रं नामैकोननवतितमो ऽध्यायः श्रीगरुडमहापुराणम्- ९० माक्रण्डेय उवाच । ततस्तस्मान्नदीमध्यात्समुत्तस्थौ मनोरमा । प्रम्लौचा नाम तन्वङ्गी तत्समीपे वराप्सराः

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe rucikṛtapitṛstotraṃ nāmaikonanavatitamo 'dhyāyaḥ śrīgaruḍamahāpurāṇam- 90 mākraṇḍeya uvāca / tatastasmānnadīmadhyātsamuttasthau manoramā / pramlaucā nāma tanvaṅgī tatsamīpe varāpsarāḥ

1.90.1

सा चोवाच महात्मानं रुचिं सुमधुराक्षरकम् । प्रसादयामास भूयः प्रम्लोचा च वराप्सराः

sā covāca mahātmānaṃ ruciṃ sumadhurākṣarakam / prasādayāmāsa bhūyaḥ pramlocā ca varāpsarāḥ

1.90.2

अतीवरूपिणी कन्या मत्प्रसाद्वराङ्गना । जाता वरुणपुत्रेण पुष्करेण महात्मना

atīvarūpiṇī kanyā matprasādvarāṅganā / jātā varuṇaputreṇa puṣkareṇa mahātmanā

1.90.3

तां गृहाण मया दत्तां भार्यार्थे वरवर्णिनीम् । मनुर्महामतिस्तस्यां समुत्पत्स्यति ते सुतः

tāṃ gṛhāṇa mayā dattāṃ bhāryārthe varavarṇinīm / manurmahāmatistasyāṃ samutpatsyati te sutaḥ

1.90.4

मार्कण्डेय उवाच । तथेति तेन साप्युक्ता तस्मात्तोयाद्वपुष्मतीम् । उद्दधार ततः कन्यां मानिनीं नाम नामतः

mārkaṇḍeya uvāca / tatheti tena sāpyuktā tasmāttoyādvapuṣmatīm / uddadhāra tataḥ kanyāṃ māninīṃ nāma nāmataḥ

1.90.5

नद्याश्च पुलिने तस्मिन्स मुनिर्मुनिसत्तमाः । जग्राह पाणिं विधिवत्समानीय महामुनिः

nadyāśca puline tasminsa munirmunisattamāḥ / jagrāha pāṇiṃ vidhivatsamānīya mahāmuniḥ

1.90.6