Adhyaya 88
देवीमाहात्म्यम् — Devi Mahatmya chapter 8 of 13
ऋषिरुवाच चण्डे च निहते दैत्ये मुण्डे च विनिपातिते । बहुलेषु च सैन्येषु क्षयितेष्वसुरेश्वरः
ṛṣiruvāca caṇḍe ca nihate daitye muṇḍe ca vinipātite / bahuleṣu ca sainyeṣu kṣayiteṣvasureśvaraḥ
88.1
ततः कोपपराधीनचेताः शुम्भः प्रतापवान् । उद्योगं सर्वसैन्यानां दैत्यानामादिदेश ह
tataḥ kopaparādhīnacetāḥ śumbhaḥ pratāpavān / udyogaṃ sarvasainyānāṃ daityānāmādideśa ha
88.2
अद्य सर्वबलैर्दैत्याः षडशीतिरुदायुधाः । कम्बूनां चतुरशीतिर्निर्यान्तु स्वबलैर्वृताः
adya sarvabalairdaityāḥ ṣaḍaśītirudāyudhāḥ / kambūnāṃ caturaśītirniryāntu svabalairvṛtāḥ
88.3
कोटिवीर्याणि पञ्चाशदसुराणां कुलानि वै । शतं कुलानि धौम्राणां निर्गच्छन्तु ममाज्ञया
koṭivīryāṇi pañcāśadasurāṇāṃ kulāni vai / śataṃ kulāni dhaumrāṇāṃ nirgacchantu mamājñayā
88.4
कालका दौर्हृदा मौर्याः कालकेयास्तथासुराः । युद्धाय सज्जा निर्यान्तु आज्ञया त्वरिता मम
kālakā daurhṛdā mauryāḥ kālakeyāstathāsurāḥ / yuddhāya sajjā niryāntu ājñayā tvaritā mama
88.5
इत्याज्ञाप्यासुरपतिः शुम्भो भैरवशासनः । निर्जगाम महासैन्यसहस्रैर्बहुभिर्वृतः
ityājñāpyāsurapatiḥ śumbho bhairavaśāsanaḥ / nirjagāma mahāsainyasahasrairbahubhirvṛtaḥ
88.6
आयान्तं चण्डिका दृष्ट्वा तत्सैन्यमतिभिषणम् । ज्यास्वनैः पूरयामास धरणीगगनान्तरम्
āyāntaṃ caṇḍikā dṛṣṭvā tatsainyamatibhiṣaṇam / jyāsvanaiḥ pūrayāmāsa dharaṇīgaganāntaram
88.7
स च सिंहो महानादमतीव कृतवान् नृप । घण्टास्वनेन तन्नादमम्बिका चाप्यबृंहयत्
sa ca siṃho mahānādamatīva kṛtavān nṛpa / ghaṇṭāsvanena tannādamambikā cāpyabṛṃhayat
88.8
धनुर्ज्यासिंहघण्टानां नादापूरितदिङ्मुखा । निनादैर्भोषणैः काली जिग्ये विस्तारितानना
dhanurjyāsiṃhaghaṇṭānāṃ nādāpūritadiṅmukhā / ninādairbhoṣaṇaiḥ kālī jigye vistāritānanā
88.9
तं निनादमुपश्रुत्य दैत्यसैन्यैश्चतुर्दिशम् । देवी सिंहस्तथा काली सरोषैः परिवारिताः
taṃ ninādamupaśrutya daityasainyaiścaturdiśam / devī siṃhastathā kālī saroṣaiḥ parivāritāḥ
88.10
एतस्मिन्नन्तरे भूप विनाशाय सुरद्विषाम् । भवायामरसिंहानामतिवीर्यबलान्विताः
etasminnantare bhūpa vināśāya suradviṣām / bhavāyāmarasiṃhānāmativīryabalānvitāḥ
88.11
ब्रह्मेशगुहविष्णूनां तथेन्द्रस्य च शक्तयः । शरीरेभ्यो विनिष्क्रम्य तद्रूपैश्चण्डिकां ययुः
brahmeśaguhaviṣṇūnāṃ tathendrasya ca śaktayaḥ / śarīrebhyo viniṣkramya tadrūpaiścaṇḍikāṃ yayuḥ
88.12
यस्य देवस्य यद्रूपं यथाभूषणवाहनम् । तद्वदेव हि तच्छक्तिरसुरान् योद्धुमाययौ
yasya devasya yadrūpaṃ yathābhūṣaṇavāhanam / tadvadeva hi tacchaktirasurān yoddhumāyayau
88.13
हंसयुक्तविमानाग्रे साक्षसूत्रकमण्डलुः । आयाता ब्रह्मणः शक्तिर्ब्रह्माणी साभिधीयते
haṃsayuktavimānāgre sākṣasūtrakamaṇḍaluḥ / āyātā brahmaṇaḥ śaktirbrahmāṇī sābhidhīyate
88.14
माहेश्वरी वृषारूढा त्रिशूलवरधीरिणी । महाहिवलया प्राप्ता चन्द्रलेखाविभूषणा
māheśvarī vṛṣārūḍhā triśūlavaradhīriṇī / mahāhivalayā prāptā candralekhāvibhūṣaṇā
88.15
कौमारी शक्तिहस्ता च मयूरवरवाहना । योद्धुमभ्याययौ दैत्यानम्बिका गुहरूपिणी
kaumārī śaktihastā ca mayūravaravāhanā / yoddhumabhyāyayau daityānambikā guharūpiṇī
88.16
तथैव वैष्णावी शक्तिर्गरुडोपरि संस्थिता । शङ्खचक्रगदाशार्ङ्गखड्गहस्ताभ्युपाययौ
tathaiva vaiṣṇāvī śaktirgaruḍopari saṃsthitā / śaṅkhacakragadāśārṅgakhaḍgahastābhyupāyayau
88.17
जज्ञे वाराहमतुलं रूपं या बिभ्रती हरेः । शक्तिः साप्यायौ तत्र वाराहीं बिभ्रती तनुम्
jajñe vārāhamatulaṃ rūpaṃ yā bibhratī hareḥ / śaktiḥ sāpyāyau tatra vārāhīṃ bibhratī tanum
88.18
नारसिंही नृसिंहस्य बिभ्रती सदृशं वपुः । प्राप्ता तत्र सटाक्षेपक्षिप्तनक्षत्रसंहतिः
nārasiṃhī nṛsiṃhasya bibhratī sadṛśaṃ vapuḥ / prāptā tatra saṭākṣepakṣiptanakṣatrasaṃhatiḥ
88.19
वज्रहस्ता तथैवैन्द्री गजराजोपरि स्थिता । प्राप्ता सहस्रनयना यथा शक्रस्तथैव सा
vajrahastā tathaivaindrī gajarājopari sthitā / prāptā sahasranayanā yathā śakrastathaiva sā
88.20
ततः परिवृतस्ताभिरीशानो देवशक्तिभिः । हन्यन्तामसुराः शीघ्रं मम प्रीत्याऽह चण्डिकाम्
tataḥ parivṛtastābhirīśāno devaśaktibhiḥ / hanyantāmasurāḥ śīghraṃ mama prītyā'ha caṇḍikām
88.21
ततो देवोशरीरात्तु विनिष्क्रान्तातिभीषणा । चण्डिकाशक्तिरत्युग्रा शिवाशतनिनादिनी
tato devośarīrāttu viniṣkrāntātibhīṣaṇā / caṇḍikāśaktiratyugrā śivāśataninādinī
88.22
सा चाह धूम्रजटिलमीशानमपराजिता । दूत त्वं गच्छ भगवन् पार्श्वं शुम्भनिशुम्भयोः
sā cāha dhūmrajaṭilamīśānamaparājitā / dūta tvaṃ gaccha bhagavan pārśvaṃ śumbhaniśumbhayoḥ
88.23
ब्रूहि शुम्भं निशुम्भं च दानवावतिगर्वितौ । ये चान्ये दानवास्तत्र युद्धाय समुपस्थिताः
brūhi śumbhaṃ niśumbhaṃ ca dānavāvatigarvitau / ye cānye dānavāstatra yuddhāya samupasthitāḥ
88.24
त्रैलोक्यमिन्द्रो लभतां देवाः सन्तु हविर्भुजः । यूयं प्रयात पातालं यदि जीवितुमिच्छथ
trailokyamindro labhatāṃ devāḥ santu havirbhujaḥ / yūyaṃ prayāta pātālaṃ yadi jīvitumicchatha
88.25
बलावलेपादथ चेद्भवन्तो युद्धकाङ्क्षिणः । तदागच्छत तृप्यन्तु मच्छिवाः पिशितेन वः
balāvalepādatha cedbhavanto yuddhakāṅkṣiṇaḥ / tadāgacchata tṛpyantu macchivāḥ piśitena vaḥ
88.26
यतो नियुक्तो दौत्येन तया देव्या शिवः स्वयम् । शिवदूतीति लोके ऽस्मिंमस्ततः सा ख्यातिमागता
yato niyukto dautyena tayā devyā śivaḥ svayam / śivadūtīti loke 'smiṃmastataḥ sā khyātimāgatā
88.27
ते ऽपि श्रुत्वा वचो देव्याः शर्वाख्यातं महासुराः । अमर्षापूरिता जग्मुर्यत्र कात्यायनी स्थिता
te 'pi śrutvā vaco devyāḥ śarvākhyātaṃ mahāsurāḥ / amarṣāpūritā jagmuryatra kātyāyanī sthitā
88.28
ततः प्रथममेवाग्रे शरशक्त्यृष्टिवृष्टिभिः । ववर्षुरुद्धतामर्षास्तां देवीममरारयः
tataḥ prathamamevāgre śaraśaktyṛṣṭivṛṣṭibhiḥ / vavarṣuruddhatāmarṣāstāṃ devīmamarārayaḥ
88.29
सा च तान् प्रहितान् बाणाञ्छूलशक्तिपरश्वधान् । चिच्छेद लीलयाऽध्मातधनुर्मुक्तैर्महेषुभिः
sā ca tān prahitān bāṇāñchūlaśaktiparaśvadhān / ciccheda līlayā'dhmātadhanurmuktairmaheṣubhiḥ
88.30
तस्याग्रतस्तथा काली शूलपातविदारितान् । खट्वाङ्गपोथितांश्चारीन् कुर्वती व्यचरत्तदा
tasyāgratastathā kālī śūlapātavidāritān / khaṭvāṅgapothitāṃścārīn kurvatī vyacarattadā
88.31
कमण्डलुजलाक्षेपहतवीर्यान् हतौजसः । ब्रह्माणी चाकरोच्छत्रून् येन येन स्म धावति
kamaṇḍalujalākṣepahatavīryān hataujasaḥ / brahmāṇī cākarocchatrūn yena yena sma dhāvati
88.32
माहेश्वरी त्रिशूलेन तथा चक्रेण वैष्णवी । दैत्याञ्जघान कौमारी तथा शक्त्यातिकोपना
māheśvarī triśūlena tathā cakreṇa vaiṣṇavī / daityāñjaghāna kaumārī tathā śaktyātikopanā
88.33
ऐन्द्रीकुलिशपातेन शतशो दैत्यदानवाः । पेतुर्विदारिताः पृथ्व्यां रुधिरौघप्रवर्षिणः
aindrīkuliśapātena śataśo daityadānavāḥ / peturvidāritāḥ pṛthvyāṃ rudhiraughapravarṣiṇaḥ
88.34
तुण्डप्रहारविध्वस्ता दंष्ट्राग्रक्षतवक्षसः । वाराहमूर्त्या न्यपतंश्चक्रेण च विदारिताः
tuṇḍaprahāravidhvastā daṃṣṭrāgrakṣatavakṣasaḥ / vārāhamūrtyā nyapataṃścakreṇa ca vidāritāḥ
88.35
नखैर्विदारितांश्चान्यान् भक्षयन्ती महासुरान् । नारसिंही चचाराजौ नादापूर्णदिगन्तरा
nakhairvidāritāṃścānyān bhakṣayantī mahāsurān / nārasiṃhī cacārājau nādāpūrṇadigantarā
88.36
चण्डाट्टहासैरसुराः शिवदूत्यभिदूषिताः । पेतुः पृथिव्यां पतितांस्तांश्चखादाथ सा तदा
caṇḍāṭṭahāsairasurāḥ śivadūtyabhidūṣitāḥ / petuḥ pṛthivyāṃ patitāṃstāṃścakhādātha sā tadā
88.37
दृष्ट्वाभ्युपायैर्विविधैर्नेशुर्देवारिसैनिकाः
dṛṣṭvābhyupāyairvividhairneśurdevārisainikāḥ
88.38
पलायनपरान् दृष्ट्वा दैत्यान् मातृगणार्दितान् । योद्धुमभ्याययौ क्रुद्धो रक्तबीजो महासुरः
palāyanaparān dṛṣṭvā daityān mātṛgaṇārditān / yoddhumabhyāyayau kruddho raktabījo mahāsuraḥ
88.39
रक्तबिन्दुर्यदा भूमौ पतत्यस्य शरीरतः । समुत्पतति मेदिन्यां तत्प्रमाणो महासुरः
raktabinduryadā bhūmau patatyasya śarīrataḥ / samutpatati medinyāṃ tatpramāṇo mahāsuraḥ
88.40
युयुधे स गदापाणिपरिन्द्रशक्त्या महासुरः । ततश्चैन्द्री स्ववज्रेण रक्तबीजमताडयत्
yuyudhe sa gadāpāṇiparindraśaktyā mahāsuraḥ / tataścaindrī svavajreṇa raktabījamatāḍayat
88.41
कुलिशेनाहतस्याशु बहु सुस्त्राव शोणितम् । समुत्तस्थुस्ततो योधास्तद्रूपास्तत्पराक्रमाः
kuliśenāhatasyāśu bahu sustrāva śoṇitam / samuttasthustato yodhāstadrūpāstatparākramāḥ
88.42
यावन्तः पतितास्तस्य शरीराद्रक्तबिन्दवः । तावन्तः पुरुषा जातास्तद्वीर्यबलविक्रमाः
yāvantaḥ patitāstasya śarīrādraktabindavaḥ / tāvantaḥ puruṣā jātāstadvīryabalavikramāḥ
88.43
ते चापि युयुधुस्तत्र पुरुषा रक्तसम्भवाः । समं मातृबिरत्युग्रशस्त्रपातातिभीषणम्
te cāpi yuyudhustatra puruṣā raktasambhavāḥ / samaṃ mātṛbiratyugraśastrapātātibhīṣaṇam
88.44
पुनश्च वज्रपातेन क्षतमस्य शिरो यदा । ववाह रक्तं पुरुषास्ततो जाताः सहस्रशः
punaśca vajrapātena kṣatamasya śiro yadā / vavāha raktaṃ puruṣāstato jātāḥ sahasraśaḥ
88.45
वैष्णवी समरे चैनं चक्रेणाभिजघान ह । गदया दाडयामास ऐन्द्री तमसुरेश्वरम्
vaiṣṇavī samare cainaṃ cakreṇābhijaghāna ha / gadayā dāḍayāmāsa aindrī tamasureśvaram
88.46
वेष्णावीचक्रभिन्नस्य रुधिरस्त्रावसम्भवैः । सहस्रशौ जगद्व्याप्तं तत्प्रमाणैर्महासुरैः
veṣṇāvīcakrabhinnasya rudhirastrāvasambhavaiḥ / sahasraśau jagadvyāptaṃ tatpramāṇairmahāsuraiḥ
88.47
शक्त्या जघान कौमारो वाराही च तथासिना । माहेश्वरी त्रिशूलेन रक्तबीजं महासुरम्
śaktyā jaghāna kaumāro vārāhī ca tathāsinā / māheśvarī triśūlena raktabījaṃ mahāsuram
88.48
स चापि गदया दैत्यः सर्वा एवाहनत् पृथक् । मातः कोपसमाविष्टो रक्तबीजो महासुरः
sa cāpi gadayā daityaḥ sarvā evāhanat pṛthak / mātaḥ kopasamāviṣṭo raktabījo mahāsuraḥ
88.49
तस्याहतस्य बहुधा शक्तिशूलादिभिर्बुवि । पपात यो वै रक्तौघस्तेनासञ्छतशो ऽसुराः
tasyāhatasya bahudhā śaktiśūlādibhirbuvi / papāta yo vai raktaughastenāsañchataśo 'surāḥ
88.50
तैश्चासुरासृक्सम्भूतैरसुरैः सकलं जगत् । व्याप्तमासीत्ततो देवा भयमाजग्मुरुत्तमम्
taiścāsurāsṛksambhūtairasuraiḥ sakalaṃ jagat / vyāptamāsīttato devā bhayamājagmuruttamam
88.51
तान् विषण्णान् सुरान् दृष्ट्वा चण्डिका प्राह सत्वरा । उवाच कालीं चामुण्डे विस्तीर्णं वदनं कुरु
tān viṣaṇṇān surān dṛṣṭvā caṇḍikā prāha satvarā / uvāca kālīṃ cāmuṇḍe vistīrṇaṃ vadanaṃ kuru
88.52
मच्छस्त्रपातसम्भूतान् रक्तबिन्दून् महासुरान् । रक्तबिन्दोः प्रतीच्छ त्वं वक्त्रेणानेन वेगिना
macchastrapātasambhūtān raktabindūn mahāsurān / raktabindoḥ pratīccha tvaṃ vaktreṇānena veginā
88.53
भक्षयन्ती चर रणे तदुत्पन्नान् महासुरान् । एवमेष क्षयं दैत्यः क्षीणरक्तो गमिष्यति । भक्ष्यमाणास्त्वया चोग्रा न चोत्पत्स्यन्ति चापरे
bhakṣayantī cara raṇe tadutpannān mahāsurān / evameṣa kṣayaṃ daityaḥ kṣīṇarakto gamiṣyati / bhakṣyamāṇāstvayā cogrā na cotpatsyanti cāpare
88.54
ऋषिरुवाच इत्युक्त्वा तां ततो देवी शूलेनाभिजघान तम् । मुखेन काली जगृहे रक्तबीजस्य सोणितम्
ṛṣiruvāca ityuktvā tāṃ tato devī śūlenābhijaghāna tam / mukhena kālī jagṛhe raktabījasya soṇitam
88.55
ततो ऽसावाजघानाथ गदया तत्र चण्डिकाम् । न चास्या वेदनां चक्रे गदापातो ऽल्पिकामपि
tato 'sāvājaghānātha gadayā tatra caṇḍikām / na cāsyā vedanāṃ cakre gadāpāto 'lpikāmapi
88.56
तस्याहतस्य देहात्तु बहु सुस्त्राव शोणितम् । यतस्ततः स्ववक्त्रेण वामुण्डा सम्प्रतीच्छति
tasyāhatasya dehāttu bahu sustrāva śoṇitam / yatastataḥ svavaktreṇa vāmuṇḍā sampratīcchati
88.57
मुखे समुद्गता ये ऽस्या रक्तपातान्महासुराः । तांश्चखादाथ चामुण्डा पपौ तस्य च शोणितम्
mukhe samudgatā ye 'syā raktapātānmahāsurāḥ / tāṃścakhādātha cāmuṇḍā papau tasya ca śoṇitam
88.58
देवी शूलेन चक्रेण बाणैरसिभिरृष्टिभिः । जघान रक्तबीजं तं चामुण्डापीतशोणितम्
devī śūlena cakreṇa bāṇairasibhirṛṣṭibhiḥ / jaghāna raktabījaṃ taṃ cāmuṇḍāpītaśoṇitam
88.59
स पपात महीपृष्ठे शस्त्रसंहतितो हतः । नीरक्तश्च महीपाल रक्तबीजो महासुरः
sa papāta mahīpṛṣṭhe śastrasaṃhatito hataḥ / nīraktaśca mahīpāla raktabījo mahāsuraḥ
88.60
ततस्ते हर्षमतुलमवापुस्त्रिदशा नृप । तेषां मातृगणो जातो ननर्तासृङ्मदोद्धतः
tataste harṣamatulamavāpustridaśā nṛpa / teṣāṃ mātṛgaṇo jāto nanartāsṛṅmadoddhataḥ
88.61